Þú finnur kirkjuna einnig á   fr yt Tw fb

Þjóðkirkjan

Kirkjuþing

Þjóðkirkjan vill að ríkið standi við samninginn

Kirkjuþing hafnaði í dag tillögu innanríkisráðherra sem í sjötta sinn fer fram á afslátt frá kirkjujarðasamkomulaginu. Kirkjujarðasamkomulagið er samningur tveggja aðila. Þar hefur þjóðkirkjan staðið að fullu við sinn hluta samningsins. Nú fer þjóðkirkjan fram á að ríkið geri slíkt hið sama og áréttar að um er að ræða efndir ríkisins á samningi en ekki fjárveitingu.

Ríkið greiðir nú laun 107 presta í stað 138 eins og samningurinn kveður á um. Kirkjuþing hefur fallist á þessa skerðingu eitt ár í senn með hliðsjón af bágri stöðu ríkissjóðs í kjölfar efnahagsáfallsins en nú eru forsendur breyttar. Þjóðkirkjan hefur mjög mikilvægu hlutverki að gegna í samfélaginu og getur ekki lengur sinnt skyldum sínum eða haldið uppi eðlilegri þjónustu með samdrætti, niðurskurði og eignasölu. Þar er komið að þolmörkum.

Svonefnt kirkjujarðasamkomulag frá 1997 fól í sér að þjóðkirkjan afhenti ríkisvaldinu um það bil 600 jarðir til eignar en fékk á móti árleg afgjöld sem námu launum 138 presta og nokkurra annarra starfsmanna kirkjunnar. Meðal afhentra eigna var land undir Garðabæ og fleiri jarðir sem stór hluti bæjarfélaga stendur nú á. Síðar bættist jörðin Þingvellir við. Alls nemur sá afsláttur sem kirkjuþing hefur veitt ríkisvaldinu um það bil 2,5 milljörðum frá árinu 2010.

Í kirkjujarðasamkomulaginu er ákvæði þess efnis að vísa megi útfærslu samningsins og fjármálalegum atriðum til gerðardómsnefndar, rísi ágreiningur um þessi atriði.